Xəbərlər
Azərbaycan özünə çoxlu etibarlı dost qazanıb
Elmar Əhmədov
YAP Salyan rayon təşkilatının sədri
Azərbaycan “COP29 və Azərbaycan üçün Yaşıl Baxış” mövzusunda beynəlxalq foruma ev sahibliyi etməklə 30 ölkədən 64 nümayəndəni bir araya gətirdi və müxtəlif məsələlər ətrafında geniş fikir mübadiləsinin aparılmasına imkanlar yaratdı. Artıq ADA Universitetində bu səpgili forumların, konfransların keçirilməsi ənənə halını alıb. Bu tədbirlərin mövzuları aktuallığı ilə diqqətdə olur və xeyli sayda iştirakçının tədbirə qatılmasını şərtləndirir. Dövlət başçısı İlham Əliyevin çıxışı və forum iştirakçılarının suallarına cavabı ölkəmiz haqqında daha dolğun məlumatların əldə edilməsinə imkanlar yaratdı. Azərbaycanın iqtisadi uğurlarından bəhs edən cənab İlham Əliyev bildirdi ki, bu imkanlar hazırda işğaldan azad edilmiş ərazilərimizdə genişmiqyaslı bərpa-quruculuq işlərinin aparılmasına stimul verir.
Dövlət başçısı İlham Əliyev ötən ilin sentyabrında suverenliyimizin bərpa edilməsini tədbir iştirakçılarının diqqətinə çatdırdı: “Keçən ilin sentyabrından 9 ay ötür və görün nə qədər heyranedici hadisələr baş verib. Bu səhər bu haqda söhbət edirdik - Azərbaycan bütün ərazisində suverenliyini bərpa etmək üçün nəhəng addımlar atdı, bu ərazilərdə innovativ texnologiyalar tətbiq edilir və yaşıl enerji zonaları yaradılır, ağıllı şəhər və kəndlər qurulur və COP29. Qazaxın kəndləri geri qaytarıldı, Rusiya sülhməramlıları Azərbaycanı tərk edir. Yəni, inanılmaz hadisələr baş verdi.”
Bu mühüm məqam da qeyd edildi ki, biz iqlim dəyişikliyi ilə mübarizə baxımından COP29-un uğurlu olmasını istəyirik. Eyni zamanda, bu, bizim üçün hekayəmizi diqqətə çatdırmaq fürsətidir. Dünyaya deyəcək sözümüz çoxdur. Biz həqiqəti söyləməliyik və ev sahibliyi etməyin üstünlüklərindən biri on minlərlə qonağın gəlməsi olacaqdır. Onların əksəriyyəti buraya ilk dəfə səfər edəcək. Onlar iki həftə və hətta daha az vaxtda vəziyyəti qiymətləndirmək imkanı əldə edəcəklər. Özlərini necə hiss edirlər, ölkəni necə görürlər və bizim planlarımızın nədən ibarət olduğunu öyrənəcəklər.
COP29-un Azərbaycanda keçirilməsi münaqişənin həll olunmasının və sülh danışıqlarında irəliləyişin nəticəsidir. Qoşulmama Hərəkatına dörd il ərzində sədrlik etməklə Azərbaycan özünə çoxlu etibarlı dost qazandı. “Azərbaycanın da daxil olduğu Qlobal Cənub ölkələrinə bu gün xüsusi diqqət lazımdır” söyləyən cənab İlham Əliyev bildirdi ki, əlbəttə ki, iqlim məsələləri ilə bağlı fikir ayrılığının bir səbəbi inkişaf etmiş, inkişaf etməkdə olan və zəif inkişaf etmiş ölkələrin məsuliyyətidir. Bu ortaq məsuliyyət ədalətli olmalı və iqlim problemlərinə mənfi təsir açıq şəkildə müzakirə edilməlidir.
Dövlət başçısı İlham Əliyev forum iştirakçılarının çoxsaylı suallarını cavablandırmaqla bu və ya digər məsələlərlə bağlı Azərbaycanın mövqeyini açıqladı. Bu çağırış xüsusi vurğulandı ki, biz bu coğrafiyada yaşamağa, təhlükəsizliyimizi, dövlətçiliyimizi, həyat tərzimizi qorumağa öyrəşmişik: “Mən dəfələrlə müxtəlif auditoriyalarda demişəm ki, Azərbaycanda faktiki olaraq hər hansı ciddi potensial riskimiz yoxdur. Qarşılaşa biləcəyimiz bütün potensial risklər xaricdən gələ bilər. Biz nə etməliyik - qapılarımızı çətinlik törədənlərə bağlı, sadiq qonaqlara açıq saxlamalıyıq.”
Günümüzün reallıqları fonunda Azərbaycanın regionda və dünya birliyində möhkəmlənən mövqeyi xüsusi vurğulanır. Azərbaycanın türk dünyasının birliyinin möhkəmləndirilməsi istiqamətində atdığı addımlar da diqqətdən kənarda qalmır. Aprelin 24-də Qırğızıstan Prezidenti Sadır Japarovun ölkəmizə rəsmi səfəri türk dünyasının birliyinə xidmət edən addım kimi dəyərləndirilir. Səfər çərçivəsində keçirilən görüşlərdə, mətbuata birgə bəyanatda Azərbaycan-Qırğızıstan münasibətlərinin dünəninə nəzər salınaraq bugünümüzün reallıqları əsasında qarşıdakı dövrün hədəfləri müəyyənləşdirildi. Qırğızıstan Prezidenti “Bu il Azərbaycanda və Qırğızıstanda Türk Dövlətləri Təşkilatı çərçivəsində yüksək səviyyədə keçiriləcək qarşıdakı tədbirləri müzakirə etdik. Mən hörmətli İlham Heydər oğlunu təbrik etdim və fürsətdən istifadə edərək bütün qardaş Azərbaycan xalqını qlobal miqyaslı tədbirin – BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) keçirilməsi hüququnu əldə etdiyinə görə təbrik edirəm. Həqiqətən bu, mühüm hadisədir və biz ürəkdən şadıq ki, qardaş ölkə belə irimiqyaslı tədbirə ev sahibliyi edir” fikirləri ilə ölkəmizin uğurlarına dəstəklərini ifadə etdi.
Bu reallığı da qeyd etməliyik ki, Qırğızıstan, Qazaxıstan, Özbəkistan, Türkmənistanla münasibətlərimiz çoxşaxəli olmaqla bərabər, eyni zamanda, milli-mənəvi maraqlara bağlılığı ilə seçilir. Bunun da ən əsas səbəbindən biri həmin dövlətlərin xalqları ilə ortaq milli-mənəvi dəyərləri bölüşməyimizdir.
Azərbaycanın xarici siyasətinin prioritet istiqamətlərindən biri Avropa ölkələri ilə əlaqələrin qurulması və inkişaf etdirilməsidir. Azərbaycan-Almaniya münasibətləri bunun bariz nümunəsidir. Dövlət başçısı İlham Əliyevin aprelin 26-da Almaniyaya işgüzar səfəri əlaqələrimizin bugünkü səviyyəsinə və qarşıdakı dövrün hədəflərinə işıq saldı. Dövlətimizin başçısının Almaniyaya səfəri Azərbaycan-Almaniya etibarlı tərəfdaşlığının hərtərəfli və yüksələn xətlə inkişafının əyani göstəricisidir. Əminliklə söyləmək olar ki, bu səfər bütün sahələr üzrə əməkdaşlığın daha yüksək səviyyəyə qaldırılmasına əhəmiyyətli təkan verəcək, gələcək inkişaf üçün böyük perspektivlər açacaq. Dövlət başçısı İlham Əliyevin həm Almaniya Prezidenti Frank Valter Ştaynmayer, həm də Almaniyanın Federal Kansleri Olaf Şolts ilə təkbətək və geniş tərkibdə görüşləri keçirildi. Ölkə Prezidenti “15-ci Petersberq İqlim Dialoqu”nun Yüksək Səviyyəli Seqmentində iştirak etdi. Tədbirdəki çıxışında Azərbaycanın enerji diplomatiyasının uğurlarından geniş bəhs edildi. Almaniya ölkəmizin dünyanın enerji təhlükəsizliyinin təmin edilməsinə verdiyi töhfələri yüksək dəyərləndirir. Almaniyanın Federal Kansleri Olaf Şolts “Sizin bugünkü səfəriniz əsasən iqlim siyasəti çərçivəsindədir və Azərbaycan COP29-un sədrliyini üzərinə götürüb, yəni, ev sahibi olacaq. COP28 çərçivəsində Dubayda vacib qərarlar qəbul olundu. Deməli, 2030-cu ilə qədər bərpaolunan enerji üç dəfə, enerji səmərəliliyi iki dəfə artırılmalıdır, metan tullantıları azaldılmalıdır. Həmçinin qeyd etmək istərdim ki, 2030-cu ilə qədər Azərbaycanın enerji sektorunda külək, Günəş və su elektrik enerjisinin payını 30 faiz artırması çox gözəl bir xəbərdir” söyləyərək onu da bildirdi ki, yaşıl enerji və hidrogen enerjisi sahələrində əməkdaşlıq üçün regionda böyük potensial mövcuddur və alman şirkətləri Azərbaycanda əməkdaşlıq etməyə maraqlıdırlar.